أ أ
قالت إيمان عباس، الاستشاري التربوي وتعديل السلوك، إن مرحلة المراهقة التي تبدأ أحيانًا مبكرًا تتطلب وعيًا خاصًا من الأهل، مشددة على أن ردود أفعالهم تجاه تصرفات الأبناء في هذه المرحلة تُعد من أهم العوامل التي تشكّل العلاقة معهم، وتؤثر بشكل مباشر على استقرار البيت النفسي والأسري.
وأضافت الاستشاري التربوي وتعديل السلوك، خلال حوار مع الإعلامية مروة شتلة، ببرنامج "البيت"، المذاع على قناة الناس، اليوم الأربعاء: "كل أب وأم لازم يبقوا فاهمين هم بيعملوا إيه لما يتلقوا كده الحاجة اللي الولاد عملوها، سواء ولاد أو بنات، يبقى رد فعلنا عامل ازاي، بالذات في سن المراهقة".
وتابعت: "أنا محتاجة أبقى واعية وحاطة في بالي إن أنا ما بقاش رد فعل لابني، ما بقاش أصلاً رد فعل، أبقى أنا، مش هو اللي بطريقه كلامه أو ردوده اللي بالنسبة لي مستفزه وضغطت عليا فهدخل معاه في دايرة إن إحنا عملنا ناطح في بعض، ودخلنا في صراع على القوة".
وأكملت: "فمثلاً لما يقول لي: لأ أنا ما عملتش كده، لأ مش هعمل كده، دي نبره فيها تحدي، ونبره الأم والأب يستقبلوها بطريقه إن 'انت نسيت نفسك ولا إيه؟'، ولو أنا دخلت معاه في الدايره دي، اللي هو: 'انت بتكلمني كده ليه؟ طب والله ما انت عامل، طب والله ما انت رايح، طب أنا هفرجك هعمل إيه'... كده أنا بقيت رد فعل لكلامه".
وأضافت: "تخيلي معايا إن العلاقه دي كأنها ترمومتر، والحوار اللي داير ما بينا هو درجات الترمومتر، على آخر المناقشه الترمومتر هيوصل لفين؟ هينفجر، هيضرب، لكن لما أبقى أنا الموقف نفس الموقف، وهو قال لي الجمله دي، وما بقيتش أنا رد فعل، أنا بقيت اللي بحرك الحوار".
واستطردت: "فأقول له: هو واضح إنك متضايق أوي لدرجه إنك بتكلمني بطريقه إنت مش واخد بالك.. أنا مش هقبل إنك تتكلم معايا بالطريقة دي، لما تبقى حاسس إنك قادر تتكلم باحترام، أنا هكمل كلامي معاك. الكلام اللي بتقوله لي ده أنا بالنسبه لي مش مناسب، وأنا هرد عليك لما يبقى في كلام مناسب قادر تختاره وتقوله".
وقالت: "تخيلي السكه تروح في حته تانيه خالص، والعلاقه تروح في حته تانيه، لأن أنا ما بقيتش رد فعل ليه. هم الولاد بياخدونا على فكره كده، وبيتبسطوا إن إحنا نتخانق، ليه؟ لأن خلاص هو الموضوع بياخد سكه تانيه غير الموضوع الأساسي، فبيتسسطوا أوي إن 'تمام، اتخانقنا، علي صوته وأنا عليت صوتي'... تمام، خلاص، رحنا في حته تانيه أصلاً".
وأردفت: "إحنا لازم نبقى أوعى، وبصراحه بشوف إن واجب علينا نقرا عن المرحله دي كويس جدًا ونتعلم إزاي نتعامل، فكره إن إحنا هنربي زي ما اتربينا، دي فكره الواقع بيقول إنها مش ناجحه أوي، لأن في اختلافات في كل حاجه".
وتابعت: "لو ما عملتش كده، هخسر ولادي، وهتبقى في مسافه كبيره أوي بيني وبينهم. فمين الكسبان؟ ومين الخسران؟ إحنا اللي هنطلع خسرانين. نقطه رد الفعل دي مهمه جدًا، لأنها بتعلّمهم حدودهم، وبتأكد إن في دور أم وفي دور ابن. لما بدخل معاه في ردود أفعال، ببقى كده أنا اللي بنزله، وبيبقى طفل لطفل، مش ناضج لطفل. وده غلط. أنا محتاجه أوري له إن الأم ليها حدود وليها دور، وأنا مش بسيطر عليك، بس أنا بحترم نفسي وبحترمك. واحترام نفسي إنّي أوقفك عن الكلام اللي ما ينفعش، ومش هكمل. ولما تبقى قادر تتكلم كويس، تعالى، كل ده بزرع احترام، بزرع قيم، بزرع أصول للمناقشه".
" width="400" height="225" frameborder="0" allowfullscreen="">
