كشفت التحقيقات في واقعة مقتل شقيق محامٍ بالقليوبية على يد تشكيل عصابي اعترض طريقه خلال سيره على الطريق الدائري، ومحاولة سرقته تحت تهديد السلاح، تفاصيل الواقعة.
التحقيقات في قضية مقتل شقيق محامٍ بالقليوبية
ويواصل القاهرة 24 نشر التحقيقات في القضية، واستمع رجال التحقيق إلى أقوال زوجة المجني عليه وجاءت أقوالها كالآتي:
س: متى كانت آخر مكالمة لكِ مع المتوفى؟
ج: أنا كلمته يوم ۲۰۲٤/۸/۲۱ حوالي الساعة ٢:١٠ صباحا.
س: وأين تحديدا كان المتوفى حال مكالمتكِ الهاتفية له؟
ج: هو ساعة لما كلمني كان لسه خارج من الشغل ورايح على إمبابة.
س: وأين مكان عمل سالف الذكر تحديدا ؟
ج: هو شغال في سوبر ماركت ألبان اللي في شارع الحجاز ميدان المحكمة.
س: وهل دار ثمة حوار بينك وبين المتوفى آنذاك؟
ج: أيوه.
س: وما هو مضمون ذلك الحوار؟
ج: قالي وأنا راجع من الشغل جيت أركب توكتوك قالي 30 جنيه، وهو ما كانش معاه فلوس غير 45 جنيه وعايز يروح إمبابة عند أمه، وفضل يكلمني على التليفون لحد ما سمعت صوت حد بيقوله الساعة كام؟ وهو رد عليه وفضل ماشي وهو بيكلمني في التليفون، لحد ما حد تاني سأله الأستيراد منين؟ قاله معرفش كمل معايا على التليفون، وبعد كده سأل واحد وقاله الدائري منين؟ فسمعته بيقول سیب أول سلم واطلع تاني سلم.
س: وهل استمرت تلك المكالمة بينك وبين سالف الذكر آنذاك ؟
ج: أيوة، لحد ما سمعت صوت حد بيكلم جوزي صوته تخين، وصوت حد تاني بيقوله أقف يالا!! وشتمه وقاله مش بقولك أقف وشتمه تاني، وبعدين سمعت صوت خالد جوزي يقول للناس من غير ضرب وبيصرخ: معايش حاجة تخدها، ولقيت خالد بيصرخ ويقول قتلوني يا هند وخدوا حاجتي، أشهد أن لا إله إلا الله، والخط قطع بیني وبینه.
س: وهل نما إلى سمعكِ ثمة استغاثة من زوجك آنذاك ؟
ج: سمعت صوت خالد جوزي بيقول للناس من غير ضرب وبيصرخ وبيقولهم معايش حاجة تاخدوها، أنا معايش حاجة!!
س: وهل أبلغكِ زوجكِ عن اسم الشخص أو من استوقفوه آنذاك ؟
ج: لا أنا سمعته بيقول للناس من غير ضرب وبيصرخ وبيقولهم معايش حاجة تخدوها، ولقيت خالد بيصرخ بصوت عالي ويقول قتلوني يا هند وخدوا حاجتي أشهد أن لا إله إلا الله.
س: ومتى تحديدا انقطع الاتصال بينك وبين المتوفى؟
ج: في نفس اليوم حوالي الساعة ٣:١٥ صباحا.
س: وهل نما إلى علمكِ مكان وجود زوجكِ المتوفى حال حدوث تلك الواقعة ؟
ج: اللي أعرفه أن هو قالي هطلع الدائري تجاه الوراق أركب عربية، عشان أروح إمبابة.
س: ومتى تحديدا علمتي بوفاة زوجكِ المجني عليه ؟
ج: تاريخ ٢٠٢٤/٨/٢٣ حوالي الساعة 10 مساء.
س: وكيف عرفتي بوفاة سالف الذكر؟
ج: يوم ٢٠٢٤/٨/٢٣ أخوه وليد كلمني وقالي دورت على خالد في المستشفيات والأقسام ما وصلتش لحاجة؟! لحد ما رحنا مشرحة زينهم نسأل على جوزي وهناك شفت جثته واتعرفت عليها، وأخوه وليد راح قسم ثاني شبرا الخيمة، وعمل محضر أنه اتعرف على جثة جوزي خالد.
س: وهل تتهمين أي أحد بقتل المجني عليه زوجك خالد مجدي شافعي ؟
ج: أيوة الناس اللي أنا سمعت صوتهم في التليفون أنهم هما اللي قتلوا جوزي وسرقوا حاجاته.
س: وما هي المنقولات التي تم سرقتها من المتوفى؟
ج: هي عبارة عن شنطة فيها محفظته والأدوية اللي بياخدها وساعة يد رجالي فضي اللون لها إسورة سوداء وخاتم فضه وعدد اثنين جهاز تليفون ماركة نوكيا.
س: ولمَن تعود ملكية تلك المنقولات؟
ج: ملكه هو.
س: وبكم تقدر قيمة تلك المنقولات؟
ج: بحوالي 12 ألف جنيه
س: وهل توجد ثمة خلافات بين المتوفى وأشخاص آخرين؟
ج: لأ، هو كان في حالة.
