رد العامل محمد بسطويسي ضحية هجوم النمر في سيرك طنطا، على التصريحات الأخيرة لمدربة الأسود أنوسة كوتة، والتي قالت خلالها إنها مرت بالعديد من الأزمات بداية من وفاة زوجها حتى الأزمة الأخير في عملها.
ضحية هجوم النمر في سيرك طنطا: دراعي اتقطع وحياتي اتدمرت
وقال ضحية هجوم النمر إن الناس يتحدثون عنه ويزعمون أنه يفعل كل هذا من أجل الحصول على المال، معلقًا: الناس بيقولوا إني خدت فلوس وحد جاب لي طرف صناعي، أنا مش عاوز كل ده وحياتي اتدمرت خلاص، هو أنا هقطع دراعي عشان التريند والفلوس؟
وعلق محمد بسطويسي على تصريحات أنوسة كوتة الأخيرة، قائلًا: أنوسة كوتة بتستعطف الناس وبتقول إنها بتربي ابنها، طب هي دخلت دنيا واتجوزت وخلفت وأنا لسه شاب صغير وخاطب، أنا دراعي اتقطع ودبلتي فيه ولسه مدخلتش دنيا، تصريحاتها بتقطعني من جوايا عشان عاوزة تكسب تعاطف على حسي.
وأضاف أن حالته الصحية غير مستقرة تمامًا بعد تعرضه إلى هذا الحادث وبتر ذراعه، وفي أغلب الأحيان لا يستطيع أن ينام ليلًا بسبب شدة الآلام التي يشعر بها وينتهي به الأمر للذهاب إلى المستشفى لعلاجه.
واختتم حديثه: أنا اللي دراعي اتقطع ومن يوم الحادثة وكل شوية بخش المستشفى، مبعرفش أنام طول الليل من كتر الوجع وكل يوم بحس إني بموت، أنوسة رمتني ومحدش سأل فيا وبتلم تعاطف على حساب دراعي.
