نشبت مشاجرة بين مسؤولي جمعية مالكة لـ مستشفى خيري في محافظة السويس وبين إدارة المستشفى، وجرى إبلاغ النجدة وتم اتخاذ الإجراءات القانونية اللازمة حيال ذلك.
مشاجرة بين مسؤولي مستشفى خيري في السويس
وقال سيد غريب، أمين صندوق الجمعية الخيرية، إن تفاصيل الأزمة تعود عندما كان داخل المستشفى ويجلس رفقة عدد من المسؤولين عنها لمتابعة انتظام سير العمل، ثم تفاجأ بمدير المستشفى يطلب منه أن يغادر المستشفى فورًا.
وتابع: الدكتور مدير المستشفى دخل وأنا قاعد مع بعض المسؤولين في المستشفى وقالي اطلع برا، حصلت مشادة وشوية تجاوزات بسيطة قولنا خلاص نعديها وخرجنا المدير برا المكتب، وفجأة لقينا حد بيكسر علينا باب المكتب والمدير داخل ومعاه ناس وضربوني واتبهدلت.
وأضاف أمين صندوق الجمعية الخيرية، أنه جرى إبلاغ النجدة لاتخاذ الإجراءات القانونية اللازمة حيال ذلك، معلقًا: أُصيبت بشرخ في مناخيري وأنا راجل تعبان عندي القلب ومكنتش عارف آخد نفسي من الضرب.
واستكمل: أنا بتعامل بكل احترام معاهم والناس كلها عرفاني في المستشفى، واللي حصل إن العقد بتاع الدكتور اللي بيدير به المستشفى باطل وعرفناه بالموضوع ده، والتضامن هي اللي قالت كده ومعانا كل المستندات والأوراق اللي تثبت الكلام اللي بقوله.
وأوضح أمين صندوق الجمعية أنه لم يبدأ بالشجار مع مدير المستشفى ولم يفتعل معه أي مشكلة، لافتًا إلى أنه لم يصفعه على وجهه، مختتمًا: أنا راجل عندي 71 سنة إزاي هروح أضرب واحد عنده 35 سنة أو أكبر شوية؟ هل ده منطق إيه اللي يخليني أحط نفسي في موقف زي ده.
