الجمعة 28/مارس/2025 - 11:51 ص
أعرب الفنان محمد شاهين، عن سعادته الكبيرة بـ ردود فعل الجمهور على شخصية المتحرش الذي قدمها في مسلسل لام شمسية، الذي يتم عرضه حاليًا في السباق الرمضاني 2025، وحقق العمل نجاحًا كبيرًا منذ عرض أولى حلقاته.
وقال محمد شاهين، في لقائه مع برنامج ET بالعربي: في الأول كنت خايف من ردود فعل الناس في الشارع لأنهم مصدقين وواخدين الموضوع بشكل شخصي أوي، ولكن دي حاجة مفرحاني أن الناس مصدقاني، وتاني حاجة أني أكون أفادت الناس.
وتابع محمد شاهين قائلا: كل ما بيحصل حاجة سلبية لشخصية وسام الناس بتبقى ماتش كورة، شفت فيديوهات للناس على السوشيال ميديا على مشهد يوسف ووسام والناس فرحانين ومتفاعلين مع المسلسل ودي حاجة تفرح لأقصى درجة، ودي حاجة إيجابية والحمد لله أننا قدرنا نوصل للناس.
وعن ما إذا كان تردد قبل قبول الشخصية، فعلق محمد شاهين: المخرج كريم الشناوي، قالي على مشروع لام شمسية ده من سنة من وقت ما عملنا مسلسل الهرشة السابعة، وجالي البيت وقالي فاكر المشروع ده أنا هعمله وأنت هتبقى معايا، والراجل ده أنا بحترمه وبثق فيه جدًا ووافقت على طول ومترددتش ثواني وكنت متحمس بشكل مش طبيعي.
وواصل محمد شاهين: تركيبة الشخصية طلعت لوحدها كده، وقعدت مع دكتورة سارة عزيز علشان أفهم ثغرات الشخصية وفكرة أنه ممكن يبقى قريب من الضحية مش لازم يكون بعيد عنها، وكريم الشناوي كان في ضهري طول الوقت وكان بيحطني على الطريق طول الوقت، وعملنا الشخصية ووصلت للناس وكرهوها الحمد لله.
