الأحد 23/مارس/2025 - 05:11 ص
تنظر المحكمة المختصة، اليوم الأحد، أولى جلسات محاكمة المتهمين بإنهاء حياة شقيق محامٍ بمنطقة القليوبية.
محاكمة المتهمين بقتل شقيق محامٍ بالقليوبية
وجاءت أقوال المتهم الأول بقتل شقيق محامٍ بالقليوبية كالآتي: أنا اسمي مصطفى. س.م.م، مقيم في الشارع العمومي بمنطقة مستطرد التابعة لقسم شبرا الخيمة.
س: ما تفصيلات إقرارك تحديدًا؟
ج: اللي حصل بالظبط إني يوم الثلاث اللي هو كان يوم الواقعة من حوالي 10 أيام تقريبًا أنا قابلت إسلام.ع.م، ومحمود.ع.ج وشهرته كبو، وخالد.ع.م، وشهرته توهان؛ قابلتهم على الشارع العمومي اللي في مسطرد، وكانوا راكبين توك توك وكانوا رايحين ناحية الدائري، وقالولي تعالى معانا هنجيب حاجة فركبت معاهم على طول، ولما ركبت طلعنا ع الدائري ناجية الخصوص، ولقيت أحمد رضا وشهرته بوقه راكب على موتوسيكل ومعاه خالد.ع.ا.م وشهرته نصه، وكان سابق هو المكنة، ويوسف إيهاب عبد الله، وشهرته كاوتش كان راكب في النص، ولما شوفنا بوقه، وقتها مخدش باله مننا كويس، وفكرنا طالعين نمسكه لأنه كان جاي وسارق موبايل وقتها.
وأضاف المتهم: بعدها لما شافنا رفع فرد خرطوش في وشنا، وأول ما اتأكد إننا صحابه نزل الفرد واتطمن، ووقتها هو نزل يشد واحد في ميكروباص وهدده بالفرد وسرق منه الموبايل وركب الموتوسيكل تاني وفضلنا ماشيين ورا بعض عكس الطرق اتجاه مسطرد في التوك توك لقينا واحد واقف على جنب فسرقنا منه الموبايل بطريق المغافلة إننا نشده من إيده.
وأضاف: وبعدها كان أحمد.ر.أ.س، واللي معاه سرقوا موبايلات وإحنا سرقنا موبايل واحد واتفقنا لما وصلنا عند نزلة مسطرد بالضبط إن كفاية كدة وهننزل نصرف الحاجة في المؤسسة، وفي الوقت دا بالضبط لقيت أحمد رضا بوقه بيقول استنوا فوقفنا، ولقيته قال استنى هاخد دا إكراه، وراح ناحية واحد كان ماشي على الطريق من الناحية الثانية، ووقتها شوفته بيشد منه الشنطة اللي كانت على كتفه والراجل بيحاول يمسكها ومش عاوز يسيبها راح يوسف نزل من المكنة وفضل واقف على الأرض زي تأمين كده.
وتابع المتهم: وقتها أحمد رضا ضربه طلقة بالفرد في صدره والراجل وقع على الأرض "وبوقه" أخد الشنطة بتاعة الراجل وجريوا، ولما سمعنا صوت الطلقة كان عالي راح كان فيه فرد خرطوش معايا نزلت علشان الناس متتلمش علينا وقفت في نص الطريق وضربت طلقة وطلعت وقتها في الهواء ووقتها بوقه جري هو ويوسف وركبوا المكنة ورا خالد عبد العزيز، وهربنا واتقابلنا عند كوبري عرابي وبالضبط كان عند كشري الخديوي، وروحنا صرفنا الموبايلات اللي سرقناها عند واحد اسمه يوسف المحل بتاعه في المؤسسة بس هو طلع قابلنا برة المحل.
