الخميس 20/مارس/2025 - 08:26 ص
علق الفنان تامر حسني على اعتزال المخرج محمد سامي إخراج الدراما التليفزيونية، الذي أعلنه عبر صفحته منذ قليل.
وعلق تامر حسني على البوست الذي كتبه محمد سامي على صفحته الشخصية بفيس بوك قائلا: أوعى تكون عايز تبعد عشان أي إحباط جايز يكون فعلًا في بعض المشاهد اللي الناس انتقدتها وأنا شخصيًا استغربتها شويه وقولت جوايا أنك مش محتاج تعملها أصلًا لأن عندك الحقيقي والأهم بس على رأيك الفنون جنون أحيانًا فكره مجنونه تنال الإعجاب وفكره لأ… بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مره ويمكن الحظ محالفكش أوي في عمل ولا 2 على مدار 14 سنه ودي حاجه مينفعش الجمهور ينساهالك.
تامر حسني عن اعتزال محمد سامي الإخراج: أوعى تخلي الزعل من بعض المشاهد ينسيك أنت قدمت ايه للدراما
وتابع: أنت قدمت مسلسل آدم اللي جمع كل المصريين وكل الوطن العربي يتفرجوا عليه زي ماتشات الكوره بسبب أنه أتكلم عن قضية تخص كل الوطن وكان بدايه لصوره جديده أول مره كانت بتتقدم في مصر وبعدها سبق الإصرار وحكاية حياه اللي كانوا نقله كبيره في ديكورات الدراما المصريه وبعدين الأسطوره والبرنس وجعفر العمده اللي حققوا نجاحات ساحقه وكانوا أعلى نسبة مشاهدات في الدراما بشكل عام وبعدهم نعمة الأڤوكاتو وإش إش وسيد الناس اللي برضو كل واحد فيهم يا أعلى مشاهده يا تاني أعلى مشاهده هزعل منك لو هتمشي محبط وأنت أنجح حد … الشجره الخضراء الجميله ساعات بيطلعلها.
وأضاف: ورق أصفر بسيط عادي بيتقص وبتفضل شجرة كبيرة وجميلة وده التطوير الطبيعي للبني آدم واللي بيمر بيه أي ناجح بيطور وعنده شخصيه بدليل مسلسلاتك بيتقال عليها مسلسلات محمد سامي وتركيز الناس معاك دليل على حبهم لأعمالك ورغم إن بعضهم بينتقدوها بس متابعينها حرف حرف ونقدهم ليك بيبقى على قد حجمك وهي دي ضريبة الناجحين الكبار … سافر وكمل حلمك وأنت منتصر بتاريخك وأوعى تُحبط وأنا عارف إن محمد سامي اللي أكتشفته أنا وقدمته للصناعه وهو عنده 27 سنة لا يمكن هيتهز ممكن يزعل يومين ويراجع نفسه في مشاهد أنا مبسوط منك أنك بمنتهى الشجاعه الأدبيه أعتذرت على تقديمها خد راحه شويه وإرجع أقوى من الأول وأنا واثق من اللي هتسافر عشانه أنه قرار هيضيف نقله كبيره لمشوارك.
وختم: أوعى تخلي الزعل من بعض المشاهد ينسيك أنت قدمت ايه للدراما ياريت قبل ما نقسوا على سامي بالطريقه دي نفتكر هو أمتعنا سنين قد ايه بمسلسلاته وأنا ذكرتها كلها عشان لو حد ناسي أفكره وعشان لو هو محبط يجمد تاني ربنا ينور طريقك وترجع أقوى وأقوى من أي وقت واثق فيك يا حبيبي، وأنا هفضل أخوك الكبير وفي ضهرك إن شاء الله طول العمر يا بطل.
