استضاف القاهرة 24، أيمن الرمادي المدير الفني السابق لفريق سيراميكا كليوباترا وأسوان، للحديث عن أسباب رحيله، ورأيه عن حكام الدوري المصري، وأبرز تجاربه مع أندية الخليج.
أيمن الرمادي في ندوة القاهرة 24
وفتح أيمن الرمادي قلبه لـ القاهرة 24، في ندوة مطولة تحدث خلالها عن كل خططه المقبلة وأبرز العروض التي تلقاها في الفترة الأخيرة، فكان الحوار التالي:
- تلقيت العديد من العروض التدريبية بالفترة الأخيرة.. حدثنا عن خطوتك المقبلة؟
إن شاء الله هكون موجود الفترة الجاية لكن مش كمدير فني لفريق فقط لكن في مشروع لأن أنا عندي فلسفة في موضوع الشغل، أنا من الناس اللي بتحب تشتغل على مشروع، هو موضوع عام وشامل، ليس فريق أول كرة قدم لفترة مؤقتة، ولذلك كل الفرق اللي كلمتني الفترة الأخيرة اعتذرت ليها، لأن حكاية أنا اطلع من نادي ادخل نادي مش بحبها، لما مسكت أسوان في البداية مكنش الهدف نعمل مشروع، كان هدفي بس الناس تعرفني هنا في مصر، أنا اشتغلت 25 سنة في الإمارات.
- كيف تقيم تجربتك مع فريق سيراميكا منذ انضمامك حتى رحيلك؟
تجربتي مع سيراميكا كليوباترا كانت مشروع بالرغم إنها بالنسبالي مش وقت طويل عكس الدوري المصري يعتبر قعدت فتره كبيرة 20 شهرًا، كان فيه حاجات تخلي المشروع يتوقف، بحلم في مشروعي أقدم كرة قدم حقيقيه غير الشائعة في مصر، ومن ضمن الأسباب اللي بوظت المشروع كان الملعب، زي ملعب نادي المقاولون اللي شاركنا عليه السنة دي، لأن كان أسلوب لعب فريقي ميقدرش يلعب على ملعب وحش.
هل تفضل الاستمرار في مصر أم العودة للتدريب مرة أخرى بالخليج؟
الحظوظ متساوية بين العمل في مصر والخليج، حاليًا بفضل العمل داخل مصر لأني خضت وقت كبير من التدريب في دول الخليج، إلا لو ظهر مشروع جيد يستحق الدراسة، ممكن أوافق حتى لو خارج مصر.
- هل يمكن تطبيق المشروع على الأهلي والزمالك؟
المشروع ممكن يتعمل في أي نادي، خاصة لو نادي جماهيري هتلاقي صدى أكبر، لأن بتزرع لقدام، والحمد لله أي حد بيمسك فرقة ورايا بيلاقي مناخ ممتاز، سواء العمل الفني أو الإداري، فدلوقتي لما بتيجي تبني لفريق جماهيري، بيذكروك أنك بنيت قواعد معينة لفريقهم، حتى لو محسوش بيها وقتها، ميمنعش أن الأهلي والزمالك يكون عندهم استراتيجية ويكون عندهم مدير رياضي فاهم وقوي، يقدر لما يتعاقد مع مدير فني للفريق الأول، زي ما بيحصل في برشلونة، جوارديولا كان شغال في القطاع وكان مشروع.
هل راض عن أدائك التدريبي مع فريق سيراميكا كليوباترا؟
لحد الأسبوع العاشر كنا في المركز الثاني، راضي بشكل غير كامل عن مشواري مع سيراميكا كليوباترا، الخطأ مش بيتجزء بين جهاز فني أو إدارة، أول أخطأنا في بداية الموسم كانت اختيار الملعب، فكان حلمي أشوف فريق سيراميكا كليوباترا من الفرق اللي بتنافس علي المربع الذهبي، والجميع أجمع أن سيراميكا كليوباترا كان الفريق الأقوى خلال بطولة كأس السوبر، وأتمنى تجربة سيراميكا يكملوا عليها، لأنه لو أخد بطولة بعد كده السي في بتاعي بيقوي، لأني بقيت من المؤسسين لفريق كان أبرز طموحه البقاء في بطولة الدوري ومصيره مربوط لآخر مباراة.
ذكرت قبل سابق إنك تقلق من الشهرة.. كيف ترى أن الجمهور يصنفك من أفضل 5 مدربين مصريين؟
أنا مدرب بشتغل بأفكار معينة واستراتيجية معينة، المفروض اتحط في مكاني الطبيعي، لكن مبحبش المبالغة، وكان يسعدني أن الناس تقول أن فريق سيراميكا كليوباترا أحسن فريق بيلعب كورة في الدوري.
سيراميكا كليوباترا الموسم الماضي تأثر كثيرًا بسبب الحكام.. ما رأيك في الأداء التحكيمي؟
لو عدد الحكام اللي بيحكموا في الدوري مثلا 20 حكم، أنا مش هكون مبالغ لو قولت فيه منهم 17 عندهم ضمير ومميزين، طبعا سيراميكا اتأثرت بشكل كبير من التحكيم، الحكم ممكن يظلمك في كورة أو كورتين لكن مش زي الملعب اللي ممكن يظلمك في كل بداية هجمة، بعض من الحكام بيتأثر بقيمة النادي وحجمه، وفيه حكام أقوياء، الحكام أكثر عنصر مظلوم في الكرة المصرية، زي عنصر المدرب، اللي بيتم إهمال إعداده.
ماذا ينقص الدوري المصري حتى يتطور إلى مستوى أعلى؟
إزاي ندير الكورة بدون مجاملات في اختيارات لجان كرة القدم، زي لجنة المسابقات ولجنة الحكام، وبعض مباريات الأهلي والزمالك بس هي اللي ممكن يبقي فيها مؤتمر صحفي بعد المباراة، الباقي بالمزاج، المؤتمر يتلغي، مينفعش منحترمش عادتنا وتقاليدنا في المباريات، لا يجوز أن تبدأ المباراة قبل الأذان بخمس دقائق مثلا، وتحدثت مع طة عزت في هذا الأمر، لو الأمر عفوي قد قمنا بالتنبيه.
الأهلي وبيراميدز.. من الأقرب لحصد لقب الدوري؟
متبقي 8 مباريات لكل فريق، الأهلي وبيراميدز عندهم 7 مباريات مقبلة لو حد من الاثنين أخدهم كاملين، خد البطولة.
ما رأيك في صفقة بن شرقي إلى النادي الأهلي؟
بن شرقي صفقة كبيرة جدًا ولاعب متميز، رغم أن نجاحه كان هنا في مصر، عبد القادر مشي وجه مكانه بن شرقي، ومستغرب إزاي لاعب زي عبد القادر منستفادش منه على مستوى المنتخبات.
هل تؤيد انتقال زيزو من الزمالك إلى الأهلي؟
أعتقد كاحتراف لو أنا مش موجود في مصر، عادي زيزو يروح الأهلي، لكن شايف زيزو خد حجم ممتاز في الزمالك وشعبية كبيرة، معتقدش ممكن يضحي بيها، وأعتقد إنه هيكمل، لأن زيزو ليس أكبر من الأهلي أو الزمالك، هو مش كل حاجة.
ما رأيك في موقف النادي الأهلي مع أزمة القندوسي؟
بشكر محمد رمضان على موقفه في مشكلة القندوسي، موقف محترف، عرف الحقايق كلها وذاع جزء منها ولم يذيع البعض حفاظًا على النادي الأهلي وعلى اللاعب، بعد الموقف اتكلمت معاه بشكل خاص، بعيد عن الملعب، هو من أرقى الشخصيات اللي ممكن يتعامل معها أحد.
هل منتخب مصر قادر على حصد لقب أمم إفريقيا؟
عندنا حاليا منتخب يمتلك كل المقومات للحصول على بطولة إفريقيا، لكن الفكرة في الإعداد من جانب الجهاز والشارع المصري.
هل ترى كولر المدير الفني الأنسب للنادي الأهلي في الفترة الحالية؟
كولر حطم أرقام قياسية مع الأهلي، وهتبان تجربته بعد سنوات وقت تقييمها، سنكتشف إنها تجربة مميزة، بغض النظر عن مستوى النادي الأهلي في الفترة الأخيرة.
