يستكمل القاهرة 24، نشر التحقيقات في واقعة مقتل شقيق محامٍ بالقليوبية على يد تشكيل عصابي، اعترض طريقه خلال سيره على الطريق الدائري، ومحاولة سرقته تحت تهديد السلاح.
أقوال المتهم السادس بقتل شقيق محامٍ بالقليوبية
وبمثول المتهم السادس خالد. ع.ا، أمام جهات التحقيق المختصة وبسؤاله بشأن الواقعة؟، أجاب: اللي حصل بالظبط إني من حوالي 10 أيام كان يوم ثلاثاء لقيت أحمد وشهرته بقو، كلمني وقاللي تعالى نطلع نسرق موبايلات من على الدائري وركبت المكنة بتاعته، وروحنا قابلنا يوسف عند الخصوص قبل محطة الرشاح وركب معانا، واتحركنا، ونتشنا موبايل من واحد كان أحمد هو اللي جابه، وبعدين واحنا بنجري لقينا توك توك بيجري جنبنا وبعدين لقيت مصطفى بصلة طالع من التوك توك.
وأضاف المتهم السادس، بعدين زميلنا مصطفى بصلة قعد ينادي على أحمد وشهرته بقو وبيقولو ياض متقلقش أنا بصلة، وبعدين وقفنا سلمنا على بعض، واتفقنا اننا هنطلع نسرق مع بعض، ومشينا ورا بعض، وأحمد رضا سرق موبايلين، ومصطفى واللي معاه كانوا سرقوا موبايل واحد، واتقابلنا عند نزلة مسطرد، ووقتها لقيت أحمد بينادي على مصطفى وبيقوله يلا ناخد الرجل اللي هناك دا إكراه، ولقيت أحمد رضا وفرد خرطوش كان في ضهره ودخل على الراجل واتكلم معاه مش عارف قال إيه، وبعد كده لقيته طلع الفرد وكنت أنا طلعت ألف بالموتوسيكل من قدام سمعت صوت طلقة.
وواصل: وقتها أحمد رضا ضرب الراجل طلقة في صدره، فاتخضيت ولقيته نزل على الراجل وهو في الأرض نتش منه الشنطة وجري ركب ورايا هو ويوسف إيهاب، وجرينا، وكان مصطفى بصلة ضرب طلقة في الجو في نص الطريق علشان محدش يجري ورانا، ووصلنا عند شارع الفيلا ـ مسطرد ـ دايرة الناحية، وبعدين نزلت روحت البيت ولقيت أحمد رضا قابلني تاني يوم بيكلمني بيقولي حسنتك 1200 جنيه وادالي الفلوس، ودا كل اللي حصل لحد ما لقيت أبويا بيقولي رئيس المباحث عاوزك في القسم روح شوف؛ فروحت سلمت نفسي.
س: وما هو الميقات الزمني لحدوث تلك الواقعة، وأين كان مستقرها ومستودعها تحديدًا؟
ج: كانت يوم ثلاثاء من حوالي 10 أيام كده، ومعرفش التاريخ بالظبط كان إيه، وكنا ناحية سوق القليوبية - ترعة الإسماعيلية - اتجاه طلعة مسطرد وقبلها كنا على الدائري من فوق.
س: صف لنا الدارجة البخارية التي كان يستقلها كلً من سالفي الذكر وما هو موضع جلوس كلً منهم بها تحديدًا؟
ج: هي كانت مكنة توك توك موديل 2014 ولونها اسود وعليه مشمع اسود من ورا، وكان خالد وشهرته توهان هو اللي سابق، وكان إسلام راكب على اليمين من ورا، ومحمود وشهرته كبو كان في النص، وعلى الشمال كان راكب مصطفى بصلة.
س: حال تقابلكم جميعًا، قص علينا ما دار بينكم من حديث؟
ج: أول ما اتقابلنا لقيت مصطفى بصلة طلع من التوك توك وبيقول لأحمد رضا متقلقش ياض أن بصلة، وبعدها سلمنا على بعض واتفقنا إننا نشتغل شوية ع الدائري سرقة موبايلات من إيد الناس اللي ماشية.
س: هل كنتم معتادين على ارتكابكم لذلك الجرم؟
ج: أيوا كنا بنطلع مع بعض دائمًا نخطف موبايلات من إيد الناس اللي بتكون ماشية على الدائري.
س: ومتى كانت آخر عملية قمتم بها؟
ج: كانت قبلها بحوالي 4 أيام تقريبًا، وكنا متعودين بصراحة إننا نطلع مع بعض نسرق موبايلات من على الدائري.
س: صف لنا مكان تقابلكم من حيث المارة، والضوء والرؤية؟
ج: الدنيا بالليل بتكون هادية شوية والإضاءة بتكون ضعيفة، وبيكون سهل نخطف موبايلات في الوقت دا.
س: وما هي الخطة الإجرامية التي وضعتموها نيلًا لمقصدكم؟
ج: اتفقوا مع بعض إننا هنمشي ورا بعض بالمكن واللي يقابل حد ويعرف يسرق منه الموبايل أو شنطة يعمل كدة ونتجمع في الآخر نبيع الحاجة ونقسم الفلوس علينا زي كل مرة.
