الجمعة 14/مارس/2025 - 03:32 م
من التفاصيل المتداولة عن حياة النجم الأمريكي جيم كاري إن أسرته كانت أسرة بسيطة جدًا.. والده بيرسي كاري كان بيشتغل محاسب صغير وكان برضه بيعزف على آلة موسيقية في ملهى لإن ظروفهم كانت صعبة عشان يقدر يصرف على أسرته.. بيقال إن جيم كان عنده حلم إنه في يوم من الأيام يكسب 10 مليون دولار، وعلشان يجبر نفسه على تحقيق الحلم ده كتب لنفسه شيك وهمي بالمبلغ ده وخلّاه في محفظته.. مثل أدوار ثانوية كتيرة جدًا وبدأ اسمه يتعرف شوية بشوية من مشاركات في مسلسلات وأفلام كبطل مساعد.
سنة 1994 جاتله أول بطولة مطلقة ومضى مع شركة إنتاج واحدة عقد لـ فيلمين مرة واحدة هما فيلم آيس فينتورا، وذا ماسك.. قيمة العقد للفيلمين مع بعض كانت = 10 مليون دولار!.. في نفس الفترة اللي كان بيوقع فيها العقود والده اتوفى.. جرى جيم على الجنازة في الكنيسة ومعاه الشيك اللي كان في جيبه.. لما شاف أبوه ميت جّوه التابوت بتاعه خرج الشيك من جيبه ورماه مع أبوه واندفن الشيك مع والده لحد النهاردة!.. بعدين وبعد ما اتشهر وحكى القصة دي في أكتر من لقاء واتسأل ليه عمل كده قال: لا معنى لأي فرحة، أي مال، وأي نجاح بدون والدي، قمت بالدورين على أكمل وجه لأنه عملي لكنني كنت وقتها بلا روح.. مافرقش معاه الشيك ولا قيمته ولا إن حلمه اتحقق ولا إن ده أول مبلغ ضخم وحقيقي يتحط في جيبه.
من 11 سنة وقبل وفاة والدي الله يرحمه بأسبوع بالظبط سمعت عن دكتور شهير الحرف الأول من اسمه أ.. قررت أروح له بالأشعة بتاعة والدي والتحاليل يمكن يكون له وجهة نظر مختلفة تخلق فينا الأمل اللي كنا بنكافح علشان يفضل مستمر.. بص الدكتور أ على ورق والدي الله يرحمه وقال لي بلهجة جافة: قوم يا ابني اتكل على الله، أبوك مش هيكمل كام أسبوع وهيموت روح شوف هتعمل إيه.. إيه الرد السخيف ده!.. قفلني جدًا من ناحيته وتقريبًا من انفعالي كنت هشتبك معاه لولا إني مسكت نفسي على آخر لحظة.. من ساعتها ولحد من كام سنة قريبة كنت مستحقر الراجل ده جدًا ومحتقر قراره إنه ازاي يواجه ابن مريض بالشكل القاسي والجليطة دي والعنف ده.. طب ودلوقتي؟.. كنت بدردش من فترة قريبة مع صديق صحفي بيغطى أخبار وزارة الصحة فحكيت له القصة وعن الدكتور -أ- ده.. فقال لي صديقي طبعًا عارفه ده من نفس بلدنا كمان بس متظلموش.. سألته: ازاي يعنى ده راجل معندوش ريحة الدم!.. قال لي: على فكرة بنته ماتت زمان بنفس مرض والدك بالظبط، ويمكن ده اللي قّوى قلبه وخلاه ما يبقاش فارق معاه وهو بيقولك اللي قالهولك!
خلال الأسبوعين الآخيرين تعبت تعب صعب شوية بسبب دور برد كان الأقوى والأقسى اللي أمر بيه من فترة طويلة.. كل المضادات الحيوية والراحة والأدوية المتعارف عليها ماكانتش جايبة نتيجة!.. كان الحل عن طريق صديق طبيب عزيز إني آخد حقنة معينة مركزة بس محتاج قبل ما آخدها إني أعمل اختبار حساسية!.. واختبار الحساسية للي مايعرفهوش هو حقن جسمك عن طريق الوريد بجزء بسيط مشتق من محتوى الحقنة الأساسية المركزة عشان تعرف تفاعل جسمك معاها هيبقى عامل ازاي.. لو ما حصلش احمرار في مكان الحقن خلال 5 دقائق تقدر تاخد الحقنة الأساسية أمان عادي، ولو حصل يبقى جسمك عنده حساسية من المادة الفعالة اللي في الحقنة المركزة فـ ماتخدهاش أفضل.. صديقي بمجرد ما اقترح اقتراحه رفضته بشكل قاطع.. لأ أنا هآخد الحقنة بدون اختبار حساسية.. قال لي مينفعش.. صممت.. رفض.. صممت أكتر.. رفض أكتر.. ووقفنا في النص بدون حل!.. كان عايز يفهم ليه الرفض ده بالنسبة لحقنة اختبار الحساسية مادام كده كده معنديش مشكلة مع مبدأ الحقنة!، ما هو اللي هياخد دي ياخد دي عادي.. ماجاوبتش ورديت رد عيالي اللي هو أهو كده وخلاص.. بس الحقيقة إن فعلًا كان فيه سبب ورا عصبيتي وقفلتي من كلمة اختبار حساسية دي للدرجة الي خلت صديقي حتى يزعل مني لإنه بيحاول يساعد وشايف رفض بدون توضيح فاعتبر دي إهانة وعدم تقدير له.
لكن ومع زيادة التعب عليا قررت آخدها لإنقاذ ما يكمن إنقاذه والحمد لله عدت على خير.. طب وإيه سبب القفلة بتاعتي؟.. اللي حصل إن قبل وفاة والدي الله يرحمه كان محتاج ياخد حقنتين مهمين بس كل واحدة فيهم كان لازم قبلهم يتعمل اختبار حساسية.. وللأسف لما اتعمل الاختبارين حصل احمرار في جلده تأكيدا إنه عنده حساسية وبالتالي منفعش ياخد الحقنتين والدكاترة شافوا حل بديل أصعب شوية ومدته ووقته أطول ومشينا فيهم المرحلة الأصعب اللي أراد ربنا في نهايتها إنه يسترد وديعته بوفاة والدي الله يرحمه.. مراحل تعب والدي كلها من أول اختبار الحساسية ولغاية الوفاة ورغم إنها مدة طويلة مش قصيرة حوالي 7 شهور كانت الأقسى عليا نفسيًا هي وكل ما تعلق بيها من ظروف وملابسات.. مش بستحمل اسمع أى حاجة عنهم.. ده اللي وضحته لصديقي وأنا بصالحه وبعتذرله وده اللي طلبته منه برضه إنه يصبر وينتظر لحد ما يعرف السبب اللي شاف منه رد فعل غير متوقع من أى حد هو عارف إنه يستحيل يصدر منه الفعل الفلاني.
وارد في لحظة ما إنك تشوف وش أو رد فعل صعب وغير متوقع من شخص أنت متأكد إن رد الفعل ده أبعد ما يكون عن شخصيته الحقيقية اللي أنت عارفها.. والحل؟.. شوية صبر لحد ما تعرف وتفهم وتستوعب.. بلاش استسهال إن فلان ده أكيد طلع سيء زيه زى الباقيين وأنا اللي كنت مخدوع فيه الفترة دي كلها!.. ينفع تساوي سنين معرفة كنتم فيها سوا زى الفل بلحظة صعبة واحدة بس!.. مفيش حد بيمشي في تعاملاته على مسطرة واحدة ثابتة على طول.. تعاملاتنا مبنية على نفسيتنا وظروفنا الخاصة في حياتنا.. أنت شايف النتيجة النهائية خالص لمجمل تجارب ومواقف مر بيها الشخص اللي قدامك.. جايز متأثر بوفاة شخص عزيز، جايز فيه أزمة أسرية حصلت فجأة ولسه ماقدرش يستجمع شجاعة الحكي عشان يحكيهالك، جايز فوجيء بظرف صحي ولسه مافاقش من صدمته.. فيه مليون سبب وسبب مانعرفش عنهم حاجة يخلوا عذره معاه لحد ما نعرف.. شوية صبر واستيعاب وتفهّم قبل ما تستسهل تخسر الناس.
