الثلاثاء 29/أبريل/2025 - 08:21 ص
شهدت قرية المستعمرة الغربية التابعة لمركز الستاموني بمحافظة الدقهلية، جريمة مأساوية راحت ضحيتها طفلة صغيرة، بعدما تعرضت للطعن 11 مرة على يد جارها.
أسرة طفلة قتلت على يد جارها ب 11 طعنة بالدقهلية: قتلها أمام البيت وعايزين القصاص
وفي تصريحات خاصة لـ"القاهرة 24"، قال والد الطفلة:"الخلافات بدأت من فترة، لما المتهم اتهم بنتي ظلما إنها شدت ستارة المحل بتاعه.
ومن وقتها وهو بيشتم فيا وفي مراتي وعيالي قدام الناس.
حاولت أحل الموضوع بطريقة كويسة عشان إحنا جيران، واتفقنا قدام أهل البلد إنه ميبقاش فيه مشاكل بينا، لكنه مرجعش في كلامه."
وأضاف:"المتهم فضل يختلق مشاكل كل شوية، وكان بيقف قدام المحل ماسك سكينة ويشاور بيها علينا، ويتحداني قدام الناس.
وفي مرة حصلت مشاجرة بيني وبينه، وضربني بالسكينة وأصابني، وعملنا محاضر فـ القسم، وبعد تدخل ناس من البلد اتصالحنا، وهو حلف على المصحف إنه مش هيقربلنا تاني، لكن رجع للتهديدات."
وتابع الأب:"في يوم الواقعة، بنتي كانت رايحة عند جدها ومعاها أخوها الصغير.
شافهم المتهم قدام المحل، وكان ماسك سكينتين، جري وراهم، ابني جري بسرعة، بس بنتي وقعت على الأرض، وراح هو طعنها قدام البيت.
مراتي خرجت على صريخ الناس، وتفاجأت ببنتي مرمية وغرقانة في دمها.
ومن ناحيتها، قالت والدة الطفلة لـ"القاهرة 24":"بنتي كانت بريئة ومعملتش معاه أي حاجة.
كانت لما تشوفه تخاف وتبعد عنه.
عمرها ما ضايقته ولا قربت من المحل بتاعه زي ما كان بيقول".
وأضافت:"المتهم كان مخطط لكل حاجة، كان مخبي السكينة في المحل بقاله أسبوع ومستني فرصة.
يوم الحادث راح يسأل عن العيال في المدرسة، ولما ملقهمش، استناهم في الشارع.
الحمد لله إن ابني قدر يهرب، لكن بنتي وقعت مقدرتش تقوم، ضربها 11 طعنة، منها طعنات في الرقبة والظهر والصدر".
واختتمت الأسرة حديثها بالمطالبة بالقصاص العادل من القاتل، اللي نفذ جريمته بدم بارد قدام الناس.
