الخميس 17/أبريل/2025 - 09:27 م
تحدثت الفنانة ريهام حجاج عن الأعمال الخيرية، موضحة أنها حريصة على أداء العمل المجتمعي الخيري كنوع من أنواع التجارة مع الله، بجانب حرصها على الوجود برفقة عائلتها وأسرتها.
ريهام حجاج: ولما أقابل ربنا حابة يبقى عندي رصيد بخلاف شغلي
وقالت ريهام حجاج، في ندوتها بالقاهرة 24: أنا زي كل الناس عندي بيت وأسرة وعيال وزوج وأهلي وإخواتي، أنا مش من الناس اللي شايفة أني لازم أدي للفن كل حياتي الحقيقة، أنا شايفة إني عندي أطفال لازم أربيهم وأبقى موجودة معاهم وعندي زوج لازم أبقى واقفة معاه وبشاركه في كل حاجة، وعندي أهلي ليهم عليا حق إني أبقى معاهم، وعندي بيزنيس طبعًا برا الشغل، وأنا بحب العمل الخيري والمجتمعي بيستهويني أوي، بتعامل مع مؤسسات وبتابع حالات معينة بيبقوا محتاجين دعم.
وأردفت ريهام حجاج: الأعمال الخيرية بتستهويني، وأنا مبتكلمش على الأعمال الخيرية لأني شايفة إننا عايشين الحياة ومحتاجين نعمل توازن بين الدنيا والآخرة، لأنك لما هتقابلي ربنا هيسألك عملتي إيه في حياتك، مينفعش أقوله أنا عيشت حياتي أعمل مسلسلات وأفلام وشهرة، فلازم يكون عندي رصيد مع ربنا بخلاف شغلي
أعمال ريهام حجاج
وعلى جانب آخر، حققت الفنانة ريهام حجاج نجاحًا كبيرًا في موسم رمضان الماضي 2025، من خلال مسلسلها أثينا، والعمل من بطولة أحمد مجدي، عمر السعيد، نبيل عيسى، سوسن بدر، محمود قابيل، سلوى محمد علي، تامر هاشم، علي السبع، أحمد قنديل، ميران عبد الوارث، چيدا منصور، چنا الأشقر، شريف حافظ، دونا إمام، مريم الفرجاني، ياسمين الهواري، وهو من إخراج يحيى إسماعيل وتأليف محمد ناير.
