كشف حمزة علاء، حارس مرمى الفريق الأول لكرة القدم بالنادي الأهلي، حقيقة ما تردد بشأن تمرده ورفضه عقد جلسة مع مسئولي القلعة الحمراء بشأن تجديد عقده.
ونشر حمزة علاء عبر حسابه على إنستجرام: "رسالة لجماهير النادي الأهلي الغالية، حابب أوضح حاجة مهمة بخصوص الكلام اللي اتقال عني في الإعلام مؤخرًا، واللي بيقول إني رفضت أقعد مع إدارة النادي أو الناس المسؤولة في النادي اللي أتشرف بالانتماء ليه منذ طفولتي وحتى الآن، الكلام ده كله مش حقيقي ومفيش منه أي حاجة صح".
وأضاف: "أنا عمري ما اتأخرت عن أي اجتماع يخص مصلحة النادي، ويحترم كل شخص مسؤول في الكيان ده وموجود دايما علشان أسمع وأتكلم في أي وقت يتطلب كده".
وواصل حمزة علاء حديثه: "النادي ده ليه مكانة كبيرة عندي وكل يوم بفتخر إني بلبس التيشيرت بتاعه، وبحس دايما بدعمكم اللي لا يقدر بثمن واللي هو الدافع الحقيقي في كل يوم ليا في نادينا العظيم".
وتابع: "وجمهور الأهلي، أنتم ليكم فضل كبير جدًا جدًا عليا، وإنتوا سبب كبير جدًا ورئيسي في اللي وصلت له محبتكم وسندكم عمرهم ما كانوا عاديين، وأنا شايل ليكم تقدير وحب كبير أوي جوه قلبي، وأعتقد كلكم عارفين إن حبي للنادي وللكيان ملوش حدود".
وأتم: "عمري ما أقدر أغلط ولا في النادي ولا في جمهوره ولا في أي مسؤول داخل النادي، وأنا مش الشخص اللي يكون ده موقفه مع النادي، فأنا أتشرف بالانتماء اليه وإلى جماهيره، كل الحب والاحترام للنادي الأهلي وجمهوره العظيم".
